شبمن گل نے انگلینڈ کے خلاف ریکارڈز کی بارش کر دی

لندن:بھارتی ٹیسٹ کپتان شبمن گل نےانگلینڈ کےخلاف پانچ ٹیسٹ میچز کی سیریز کےدوسرے میچ میں شاندار ڈبل سنچری اسکور کرکے متعدد ریکارڈز توڑ ڈالے۔ برمنگھم میں جاری دوسرے ٹیسٹ کے دوسرے دن شبمن گل نے 269 رنز کی شاندار اننگز کھیلی، یہ ان کے ٹیسٹ کیریئر کی پہلی ڈبل سنچری ہے۔269 رنز کی اس اننگز کے ساتھ وہ ٹیسٹ کرکٹ میں سب سے بڑی اننگز کھیلنے والے بھارتی کپتان بن گئے ہیں ۔ اس سے قبل یہ اعزاز ویرات کوہلی کے پاس تھا، جنہوں نے 2019 میں 254 رنز بنائے تھے۔25 سالہ شبمن گل انگلینڈ میں ڈبل سنچری بنانے والے پہلے بھارتی کپتان  بھی بنے ہیں ۔ انہوں نے محمد اظہر الدین کا 35 سال پرانا ریکارڈ بھی توڑ دیا جنہوں نے 1990 میں مانچسٹر میں 179 رنز بنائے تھے۔اس کے علاوہ شبمن گل نے سنیل گواسکر کا 1979 میں اوول میں بنایا گیا 221 رنز کا ریکارڈ بھی توڑ دیا۔ بھارت نے پہلی اننگز میں 587 رنز بناکر آؤٹ ہونے کے بعد میچ پر گرفت مضبوط کرلی ۔