شرح سود میں ایک فیصد کمی ، ترسیلات زر مزید بڑھنے کی خوشخبری

کراچی:اسٹیٹ بینک آف پاکستان کی جانب سے شرح سود میں کمی کا اعلان کردیا گیا ہے جب کہ گورنر اسٹیٹ بینک نے کہا ہے کہ افراط زر میں آنے والے مہینوں میں اضافہ ہوگا۔ گورنر اسٹیٹ بینک جمیل احمد نے پریس کانفرنس میں مانیٹری پالیسی کا اعلان کیا۔ انہوں نے کہا کہ پالیسی ریٹ میں 100 بیسس پوائنٹس کی کمی کرکے شرح سود کو ایک فی صد کم کرکے 13 سے 12 فی صد مقرر کیا گیا ہے۔معاشی ڈیٹا میں کافی مثبت ٹرینڈ ہیں، تاہم  افراط زر اور کرنٹ اکاؤنٹ بیلنس پر بہت دباؤ تھا ۔ افراط زر اور کرنٹ اکاؤنبٹ میں کافی مثبت پیش رفت ہوئی ہے۔

افراط زر کچھ ماہ میں بہت تیزی سے کم ہوا ہے ۔ مئی 2023ء  میں 38 فیصد رہا  اور گزشتہ ماہ 4.1 فیصد پر آگیا۔جنوری کا افراط زر دسمبر سے بھی کم رہے گا۔ انہوں نے بتایا کہ 6ماہ کا کرنٹ اکاؤنٹ 1.2 ارب ڈالر سرپلس رہا، اس سے قبل 4.1 ارب ڈالر کا خسارہ رہا تھا۔ ہمیں زرمبادلہ کے ذخائر مستحکم کرنے کا موقع ملا اور ہماری توقعات سے زیادہ استحکام آیا۔