ایران اورامریکہ کےدرمیان تاریخی معاہدے پردستخط کا مقام تبدیل

ایران اور امریکا کے درمیان تاریخی معاہدے پر دستخط کا مقام تبدیل کر دیا گیا۔

ایران اور امریکا کے درمیان مفاہمتی یادداشت پر دستخط کی تقریب جنیوا کے بجائے اب سوئٹزرلینڈ کے برجن سٹاک ریزورٹ میں 19 جون کو ہوگی۔

سوئٹزر لینڈ کی وزارت خارجہ کے مطابق یہ مقام وسطی سوئٹزرلینڈ میں لوسرن کے قریب واقع ہے اور اپنی دشوار گزار علاقے کے باعث سکیورٹی کے حوالے سے موزوں سمجھا جاتا ہے۔

سوئس وزارتِ خارجہ کے مطابق اس مقام کی تجویز پاکستانی اور قطری ثالثوں کے ساتھ ساتھ امریکا اور ایران کی جانب سے بھی دی گئی تھی۔

ذرائع کے مطابق تاریخی امن معاہدے کی تقریب پاکستان کی میزبانی میں ہوگی، تقریب کیلئے وزیر اعظم شہباز شریف جمعرات کو روانہ ہوں گے، نائب وزیراعظم اور وفاقی وزراء بھی وزیراعظم کے ہمراہ ہوں گے۔

ذرائع کا کہنا ہے کہ تقریب میں ایران کی جانب سے پارلیمانی سپیکر اور مذاکرات کار باقر قالیباف شرکت کریں گے۔

اس سے پہلے امریکی صدر ڈونلڈ ٹرمپ بھی تقریب میں شرکت کا اشارہ دے چکے ہیں، انہوں نے کہا تھا کہ ہوسکتا ہے وہ بھی تقریب میں جائیں، ویسے نائب صدر جے ڈی وینس دستخط کی تقریب کے لیے جائیں گے۔

قطری وزارت خارجہ کا کہنا ہے کہ پاکستان کی قیادت میں ثالثی کا حصہ بن کر مذاکراتی عمل میں شامل رہے، امریکا ایران ڈیل پر دستخط کی تقریب میں قطر کی نمائندگی موجود ہوگی، پاکستانی ثالث، فریقین اور علاقائی ممالک تقریب میں شریک ہوں گے۔