یوم پاکستان پرعسکری قیادت کا خصوصی پیغام، قوم کومبارک باد

 مسلح افواج کے سربراہان نے 86ویں یوم پاکستان پر خصوصی پیغام جاری کرتے ہوئے قوم کو مبارک باد پیش کی ہے۔

پاک فوج کے شعبہ تعلقات عامہ (آئی ایس پی آر) کے مطابق یوم پاکستان پر آرمی چیف، چیف آف ڈیفنس فورسز، فیلڈ مارشل سید عاصم منیر، نیول چیف ایڈمرل نوید اشرف اور ایئر چیف مارشل ظہیر احمد بابر سدھو نے قوم کو مبارک باد پیش کی۔

جاری بیان میں کہا گیا کہ 23 مارچ 1940ء ہماری تاریخ کا ایک اہم سنگِ میل ہے، اس دن ہمارے اجتماعی وژن کو واضح شکل ملی اور ایک آزاد وطن کے قیام کی راہ ہموار ہوئی، ایمان، امید اور عزم و استقامت کی قوت سے بھرپور یہ دن قوم کے غیر متزلزل ارادے کی عکاسی کرتا ہے، اللہ تعالیٰ کے فضل و کرم سے ہماری قوم جمہوریت کے پرچم تلے ترقی کی راہ پر گامزن ہے۔

آئی ایس پی آر نے کہا کہ پاکستان اپنے جمہوری اداروں کو مضبوط اور قومی سلامتی کو یقینی بنانے کیلئے پرعزم ہے، پاکستان اپنے شہریوں کی فلاح و بہبود کے تحفظ کو یقینی بنائے گا، ملک کو دہشت گردی اور انتہا پسندی جیسے چیلنجز کا سامنا ہے، پاکستان کی مسلح افواج، عوام اور قانون نافذ کرنے والے ادارے متحد ہیں۔

جاری بیان میں مزید کہا گیا کہ مسلح افواجِ پاکستان ہر دم چوکس اور ثابت قدم ہیں، دہشت گردی کے خلاف داخلی سلامتی کو برقرار رکھا جائے گا، پاکستان عالمی برادری کا ایک ذمہ دار اور اصولی رکن ہے، اور دنیا بھر میں امن، استحکام اور تعاون کے فروغ کیلئے کوشاں ہے، ایک متحد قوم کی حیثیت سے ہم مستقل امید، بے مثال عزم کے ساتھ آگے بڑھ رہے ہیں۔