ایرانی آئل ٹینکروں پرحملہ ہوا تو امریکی اڈے بھی محفوظ نہیں رہیں گے، پاسدارانِ انقلاب کی دھمکی

دونوں ممالک کے درمیان بالواسطہ سفارتی رابطے جاری ہیں اور خطے میں کشیدگی کم کرنے کی کوششیں کی جا رہی ہیں

 ایران کی پاسدارانِ انقلاب نے امریکا کو سخت وارننگ دیتے ہوئے کہا ہے کہ اگر ایرانی آئل ٹینکروں کو نشانہ بنایا گیا تو خطے میں موجود امریکی تنصیبات اور فوجی اہداف پر حملے کیے جائیں گے۔

ایرانی سرکاری خبر رساں ادارے کے مطابق آئی آر جی سی ایرو اسپیس فورس کے کمانڈر نے اپنے بیان میں کہا کہ ایران کے میزائل اور جدید ڈرون مکمل طور پر تیار ہیں اور کسی بھی جارحانہ اقدام کا فوری جواب دینے کی صلاحیت رکھتے ہیں۔

انہوں نے کہا کہ ایرانی افواج نہ صرف امریکی فوجی اڈوں بلکہ خطے میں موجود دشمن کے جنگی جہازوں کو بھی نشانہ بنا سکتی ہیں۔ ان کا کہنا تھا کہ ایران اپنی تیل بردار جہاز رانی اور قومی مفادات کے تحفظ کے لیے ہر ممکن اقدام کرے گا۔

دوسری جانب ایرانی خبر ایجنسی نے دعویٰ کیا ہے کہ امریکا نے پاکستانی ثالثوں کے ذریعے ایران کو جنگ بندی میں توسیع سے متعلق نئی تجاویز بھجوائی ہیں۔

رپورٹس کے مطابق دونوں ممالک کے درمیان بالواسطہ سفارتی رابطے جاری ہیں اور خطے میں کشیدگی کم کرنے کی کوششیں کی جا رہی ہیں۔

ماہرین کا کہنا ہے کہ آبنائے ہرمز میں جاری تناؤ اور امریکی بحری سرگرمیوں کے باعث مشرق وسطیٰ کی صورتحال انتہائی حساس ہوچکی ہے۔ ایران پہلے ہی واضح کرچکا ہے کہ اگر اس کی تیل برآمدات یا بحری راستوں کو نقصان پہنچایا گیا تو اس کا سخت جواب دیا جائے گا۔