پاکستان کو تنہا کرنے کی مودی کی 10 سالہ مہم بری طرح ناکام رہی: عرب میڈیا

عرب میڈیا رپورٹ کے مطابق پاکستان کوعالمی سطح پرتنہاکرنے کی بھارتی وزیراعظم نریندر مودی کی 10 سالہ مہم ناکام ثابت ہوئی۔

الجزیرہ کی رپورٹ میں کہا گیا ہے کہ مودی کا 2016 میں پاکستان کو دنیا سے الگ تھلگ کرنے کا اعلان بری طرح ناکام ہوا، پاکستان آج واشنگٹن، بیجنگ، تہران اور ریاض کے ساتھ بیک وقت رابطے میں ہے، پاکستان خطے اور علاقائی معاملات پر اثرانداز ہونے والا ایک اہم فریق بن چکا ہے۔

رپورٹ کے مطابق 2025 کی پاک بھارت کشیدگی کے دوران پاکستان نے عالمی بیانیےکی جنگ میں برتری حاصل کی، دنیا نے پہلگام واقعے پر پاکستان کے خلاف بھارتی الزامات کو بغیر ثبوت قبول نہیں کیا، بھارت معرکہ حق کے بعد فیلڈ مارشل پرتنقید کرتا رہا جبکہ ٹرمپ نے انہیں “غیرمعمولی شخصیت” قرار دیا۔

الجزیرہ کی رپورٹ میں اعتراف کیا گیا ہے کہ پاکستان اورچین کی “ناقابلِ شکست شراکت داری”خطے میں ایک نئی حقیقت بن چکی ہے جبکہ حسینہ واجد کے دور کے خاتمے کے بعد پاکستان اور بنگلا دیش کے تعلقات میں نمایاں بہتری آئی ہے۔

عرب میڈیا رپورٹ میں کہا گیا ہے کہ پاکستان خلیجی ممالک کے لیے ایک ابھرتے ہوئے سکیورٹی پارٹنر کے طور پر سامنے آ رہا ہے، جبکہ مودی حکومت کی مسلم مخالف پالیسیوں نے بھارت کی بین الاقوامی ساکھ کو شدید نقصان پہنچایا ہے۔

رپورٹ کے مطابق معدنیات، سرمایہ کاری اور سفارتکاری سے پاکستان نے امریکی پالیسی سازوں کی توجہ حاصل کرلی ہے، امریکی صدر ڈونلڈ ٹرمپ 30 سے زائد مرتبہ پاک بھارت جنگ بندی کا کریڈٹ لے چکے، جبکہ نئی دہلی مسلسل تردید کرتا رہا، جنگ بندی کے معاملے پر مودی اور ٹرمپ کے درمیان اختلافات نے واشنگٹن اور نئی دہلی کے تعلقات میں دراڑ پیدا کی۔